Jungschinamitag us Sicht vo de Leiter


Gemäss aktuellem Protokoll
träffed mir eus, ach wie toll
am eis bi de EMK
sind ächt alli da?

D' Fitis isch det parat
mir andere wie immer z' spat
wäg was au immer…
uf jedefall wird's gäng wie schlimmer

Fünf Minuten vor der Zeit
ist des Jungschärlers Pünktlichkeit
doch für d' Leiter gilt das nöd
sinds dezue ächt z' blöd?

Sind den ändlich alli da
fangt d' Hektik grad vo vorne a
Wo sind eusi Guezli blibe?
Wär hät's nöd is Protokoll ie gschribe?

Das cha sicher nöd de Blubb gsi si
denn Protokoll schriibt är ja niie
Im Normalfall tuet är vorbereite nöd
denn das isch ihm nämlich z'blöd

Nomal alles durespräche
was hämmer dasmal alls vergässe?
Trassband, Bächer, G-Spiel- Mat
d' Leiter sind immer nonig satt

Husch husch muen alls no gmacht si
denn d' Teilnehmer chömed choge gli
Det en Poste, da en Zoll
D' Chind finded das nämli toll

Wo isch au de Spielplan hii?
Dä isch glaub würkli nöd debii
D' Laeta versteckt sich hinterem Baum
di andere haltet iri Gfühl im Zaum

Waaas, nur no foif Minute?
Etz mümmer eus aber spute!
Di erste sind nämli scho da
und d Jungschiüebig fangt jetzt a

Für Singe und Andacht hockemer in Chreis
und alli mached no vil z vil Mais
sitze, ligge oder stah
was lönd d' Leiter durega?

Scho gli heissts "nur no eis"
und ruhig wird's im Chreis
d' Leiter lueged ganz verschmitzt
ob d' Alopex scho chräftig schwitzt

S' Grücht isch allne guet bekannt,
dass d' Alopex, ganz provokant
bim letschte Lied fangt a studiere
wie si ächt iri Andacht wot präpariere

Nach de Andacht wird's dänn heiter
dän erchlärt de verantwortlich Leiter
mit was si sich zu später Stund
iri Hirnzälle hät bracht zum Schwund

D' Safran euse Paparazzi
Isch au hüt käs liebs Spatzi
sondern jagt allem hinedrii
wo für de Betroffni chönti peinlich sii

Aaluege chamer das, wie jede weiss
uf de Homepage, ohni grosse Ziitverschleiss
Eigentlich wäred det au z' betrachte
d' Bricht vo eusne heisse Schlachte

Doch nomal zrug zum Namitag
det hät, nach de allerletschte Frag
s' Spiel au no chöne gstartet werde
ohni jeglichi Beschwerde

Dank de Fitis irere kuule Lischte
isch dasmal es Fröilein uf d' Pischte
hät eus en feine Zvieri organisiert
und uf Befehl au grad spendiert

Wo den dä isch gsi verschlunge
händ mir eus gklopfet fescht uf d' Lunge
will mir sind alli fasch verstickt
und säged nur "bisch nöd ganz pickt"

Wo häsch du dänn au s z'Trinke gla
Für was hämmer etz d' Bächer mitgna???
Doch tüemer nüme witer Chlage
susch gahts eus am Änd no an Chrage

D' Ziit gaht zügig scho verbii
und wie immer chönd mir nöd pünktlich sii
doch d' Eltere sind sich das jo gwöhnt
und mir vo dem här rächt verwöhnt

"Blick auf- Hilf auf" isch de Schluss
ganz traditionell und ohni Kuss
D' Chind stiiged i d' Auto ii
Doch für eus Leiter ischs no lang nöd verbii

Stäge uf und Stäge ab
bis keine me isch uf Trab
doch s' Material mues versorget wärde
susch gits nur no neui Beschwerde

D' Laeta möchti gärn id Jugi
d' Fitis uf de nächsti Flugi
de Blubb isch im Trainer parat
und d' Safran wartet uf en Ufzgiautomat

Aber d' Alopex, wie immer fiis
Zeigt ufs Papier wo's isch no ganz wiis
Det setted no Iidrück ane
nöd nur vo Fraue, au vo Manne

Wo den die Tortur isch z' Änd
Gäbed sich den alli d' Händ
froh das si's eimal meh händ gschafft
und sich zum Vorbereite händ ufgrafft

A de Freud vo de Teilnehmer hät mer gseh
si händ Luscht nach no viiiil meh
drum wärded mir au wiiterschaffe
und eus immer wider zämeraffe

Mir hoffed ihr händ en Iiblick gha
wie mir mit eune Chind sind dra
doch muemer au no säge
das eui Chind, gar nöd verläge

eus au immer wider lobe tüend
so das mir fasch wiitermache müend
Für di nächst Ziit wird das no so sii
doch euses Gedicht isch jetzt verbii

Wäg däm müend ihr nöd brüele
und au nöd im Dräck go umewüehle
bliibed doch ganz eifach daa
und tüend eu verwöhne laa

Mir sueched wohl no lang en Schluss
das hämmer irgendwie nonig so duss
drum säged mir ganz eifach Tschüss
und wie immer, ohni Küss
Alopex, Fitis, Safran
  www.waldkauz.chback top