Bericht vom Regenbogenpfila 2005

Am Friitig am 6i isches los gange für die Grosse! Mir sind mit de Velos underwägs gsi. Zerscht sind mir uf Wetzikä will mir no d'Vivi und d'Vikunja brucht händ. Suscht wäred mir nöd vollständlig gsi! Zum glück isch dänn d'Vikunja gliich no cho : Am 20.45 Uhr sind mir dänn au uf eusem Lagerplatz acho (am Grifäsee [Muhr]) Mir händ sofort agfangä Zelt ufstelle. Danke Alopex, dass du scho alles Material usgladä häsch! Dä Blubb hät natürlich wie immer s'WC ufgstellt aber dämal mit hilf vo dä Drisse. Nach dem all än Platz gha händ zum schlafe und mir no Rägebogächuechä gässe gha händ, sind mir müed aber glücklich in Schlafsack gschdigä.
Am Samstig händ mir denn zerscht emal no dä Pfupf (Berni) und dä Linus uf äm Lagerplatz lut willkommä gheissä! Denn isch no dä Rescht ufgstellt wordä. Am 12i sind dänn au no die jüngere erschinä. Natürlich händ mir zersch emal Zmittag gässe: Härdöpfelstock, Sosä, Erbs mit Rüebli und Salat. Nachdem denn au die Chline sich IIpuft gha händ, hät de Buur (de Walti) eus än Baraggäwagä bracht wo öpä 20 Personä drin platz gha händ. Es hät i dä Zwüscheziit nämlich agfangä Rägnä. Es isch aber luschtig gsii, im Räge es "Alle gegen Alle" z'spielä. Mir sind denn in Wagä go än Rägebogäböllä us Blachestoff baschtlä. Denn än Zvieri und nachhär Andacht, Freyziit, Znacht (weiss leider nümä wasäs gäh hät, aber sicher öpis feins : ), dä Ämtli und nomal echli Freyziit, sind mir in Wald go äs G-Spiel mache. Mit em berüemtä Maler "Picassi". Bi däm Spieli häts nur ein Siegär gäh. Aber d'Alopex het eus äs Guetnachtgschichtli verzellt wo au de letscht en Sieger gsii isch. Denn sind mir sofort i eusi "Penntüte" (Schlafsack) gumpät und händ eusi Augä zuegschletst und luut use gschlafä!
Am Sunntig häts nöd wie üblich zerscht z'Morgä gäh, sondern mir sind grad in Wald und händ vier Chind tauft. D'Claudia, d'Isabel, d'Isabelle und d'Monika. De Postelauf hät zerscht no rächt locker uusgseh. Wos denn aber händ müessä bi "Mexiko" so scharffi Sosä löfflä, isches de einte doch grad echli anderscht wordä. Schliesslich hät no niemert öpis gässe gha. Denn händs müessä ä steili Seilbahn aberutschtä, mit verbundnä Auge wieder de Hoger deruf chraxlä, gfesslet am Baum uusharrä und zum Schluss au no müese die luutä Tenderknaller ushalte. Aber sie händ das SUPER gmacht!!!!! Jetzt gheissets Tajuña, Beppu, Microtus und Jocoso. Herzlich willkommä! Ändlich häts denn z'Morgä gäh! D'Ämtli sind gmacht gsii und mir händ en Gottesdienst gfiiret. S'Thema isch gsii: dä Heilig Geist wo in eus isch. De gueti z'Mittag isch i eusnä Büüch gsi und die Langwilig : Freyziit isch au umägschlagä gsii, wo mir ä chlini Olympiadä veranstaltät händ. Dänn häts ä chlini stärchig gäh und denn sind mir go am Böllä witerschaffä. Eusä z'Nacht isch sehr speziell gsi. Will dä Berni und dä Linus wieder händ müessä gha, händ D'Zéphir und d'Dominique für eus äs feins Riisgasimiir kochäd. Dä Köbi, dä Rucki und d'Viki sind au no mitcho. Wo denn wieder all gangä sind, händ mir ä Schnizeljagdt gmacht. Wills denn scho so spaat gsi isch, hät eus d'Alopex wieder äs Guetnachtgschichtli verzellt (echli es druurigs) und denn sind mir wieder go chrösä. Aber zerscht händ mir natürlich no än Dessär gha: Schoggi und Vanille-gräm! Mhhh, so fein!
Am Mäntig häts am halbi achti scho wieder guetä morgä gheissä. Dä z'Morgä isch gässe gsi und mir händ schowieder müessä aafangä zämeruumä. Am elfi händ mir dänn nomal Andacht gha. Plötzlich häts afangä Tröpflä. Sofort sind mir ufgsprungä und händ wiiter zämegruumt. Zum glück häts wieder ufghört Rägne. Denn hämmer z'Mittag gässe, ä feini Gmüessuppä mit Wienärli. Es sind nonig all fertig gsii mit ässe, wos schowieder hät afangä Rägnä. Dämal aber so fescht, dass es eusi Suppä ganz wässerig gmacht hät und s'Brot isch au ganz ufgweicht gsi isch. Mit dä Chlinä sind mir dänn fängs losgfahrä und die Grossä händ no müessä de reschtä zämerumä. Wo dänn au sie fertig gsi sind, händ au sie därfä Heifahrä. Müed und chli nass sind mir dänn alli zäme z'Wetzikä acho. Ich bin froh, dass mir nümä händ müessä uf Bäretschwil uä trampä. D'Fitis isch no so fit gsi, dass sie bis uf Betschwil gfahrä isch!

Mir hät s'Lager mega gfallä und eu hoffentlich au!

Blick auf - Hilf auf
  www.waldkauz.chback top