Bericht vom Weekend, 28.- 29.9.02


Hoi du
Hey, vom 28. bis 29. Septebmer han ich öppis mega cools erläbt! ich bin is Jungsch- Weekend gange. Öppe am vieri sind ali Teilnehmer itrudlet gsi. E Viertelstund später simmer am Lagerplatz im Allenberg acho. Dänn hämmer eus i drü Gruppe ufteilt, übrigens simmer 13 Meitli, 3 Buebe, 4 Leiterinne und ein Leiter gsi.
Di einti Gruppe hät aglueget, wie mer es guets Füür macht und e stabili Lagerchuchi konstruiert, di zweit hät chli usprobiert, wie mer us Militärblache äs Zält macht und di dritt Gruppe hät glernt wie mer normali Zält ufstellt. Ich bin bim erste Durchgang zum Füürle gange und bim zweite zum Zältbau us Militärblache.
Am sächsi simmer dän fertig gsi mit ufstelle, drum hämer eus chönne iirichte. D' Fitis, d' Annina und ich händ imne sogenante Berliner, es Zält us Blache, gschlafä. Womer mit iipuffe fertig gsi sind häts Hörnli, Ghackets und Öpfelmues gä.
Nach em Abwäsch und es paar chliine Spiili sind di erste gstartet zum d' Schnitzel für d' Schnitzeljagd uszlege. Mir sind öppe am halbi Zähni hinedri. Drüviertelstund später simmer wider zrug gsi und händ es Stückli Chueche übercho. Nacheme Guetnachtgschichtli simer dänn ab i d' Fädere. ( Es isch mega chalt gsi! ich han mit minere Wulechappe gschlafe, aber e iischalti Nase gha, brrr)
Am Morge sind eus d Leiter scho rächt früeh cho wecke, am halbi achti. Ich han dänkt, chelter chas nüme wärde, han zwei Tiischi, s Tränerjäggli, en Pulli und z' oberst no s' Jungschhämp agleit. Damit mir nöd früüered hät d' Tesa mit eus Morgägymnastik gmacht. Nachhär häts Zmorge gä. Nutella und C(h)aotina hät natürli nöd gfählt! Am viertel ab Nüni händ mir zerst es paar Lieder gsunge und dänn hät d' Alopex ä Gschicht zu de Stell us Philipper 2, 3-5 verzellt.
Am Zähni händ mir dänn euses Wärli müesse packe und vo halb Elf bis Elf händ mir no chli s' Blinzlispiil gmacht. Nachere chliine Zwüscheverpflägig (Schoggi und Brot) hämmer churz nach de Elfi d Zält scho wider müesse abbrächt. Nach 20 Minute simmer scho fertig gsi.
Öppe am Zwölfi isch euses Lager mit em Jungschiruef: "Blick auf- Hilf auf" fertig gsi.
Es grüesst dich ganz fest
d' Laeta
  www.waldkauz.chback top