Bericht vom Weekend der Grossen: TexAid

Bim Thema TexAid sind nur di eltere Teilnehmerinne (ab Jahrgang 94) debi gsi. Mir hend ois am Friitig Aabig ungefähr am 6i in Vorderbettswil troffe. Nachdem mer fründlich begrüesst worde sind vo de Alopex, de Fitis und em Blubb hemmer de feini Hörnlisalat, wo ois d Fitis bracht hett, därfe probiere. Si hett ois denn au gseit, dass mer no en Dessert überchömed vom Esthi, aber de sig noni fertig gsi vorane. Mir hend drum denn beschlosse mer gönged am Esthi no en chliine Bsuech go abstatte und oise Dessert selber go abhole.
Wommer zrugg cho sind hemmer s' Gschirr logischerwiis no müässe abwäsche. Mir hend das allerdings nur provisorisch gmacht, da mer no kei heiss Wasser gha hend. Nachher hemmer alles uufgschtellt. Mir hend mega Froid gha will mir oises erschte noie Zält (danke allne fürd Spende!) hend chönne uufschtelle. De Blubb isch eigentli nur churz cho zum ois s WC buddle, nachher hett er wieder müässe ga. Au d Fitis isch nachdem mer de Dessert gholt gha hend wieder gange.
Nachdem alles erledigt gsi isch hett ois d Alopex über d Gruppene informiert. Das es nid allzu unfair wird, sind d'Skua, S'Warai und d' Silex und d' Drisse, d' Baikal und ich innere Gruppe gsi. Mir hend denn churz (aso s isch den fasch e Stund worde!) Ziit gha zum ois en Menuplan zämäzstelle us dänä Ässware wo mer übercho hend. Denn hett ois Tesa no es churzes Bsüächli abgschtattet und mir hend ois no sportlich betätig. Denn isch scho Ziit gsi für is Bett.

Am Morge isch ois d' Alopex churz vor de Achte cho wecke und hett gseit si gäng jetzt schnell i d'Beckerei go de Zmorge hole. Wommer usem Zelt cho sind, hett si scho es Füürli gmacht gha und d' Milch druf warm gmacht. Am halbi Nüüni hetts denn Zmorge gä und denn s' Abwäsche… Das mer nid nur manuell sonder au nochli Chopfarbet müänd leischte hetts nachher es Quiz gäh über Huusfraue. Und denn isch shco wieder Ziit gsi zum Füürli mache und aafange choche.
S' Füür vo minere Gruppe hett zerscht nid recht welle, aber mit Hilf vo de Alopex isch denn au das gange… Bim Zmittag isch denn au d' Fitis wieder zu ois gschtosse. Es isch mega fein gsi und mer hends gnosse underem schön blaue Himmel mit Sunneschii z hocke. Denn hett d' Fitis e Aadacht gha über d Maria und d' Magdalena. Mir hetted sölle sägä wem mir ähnlicher sind, aber das isch gar nid so eifach.
Denn hemmer es gmisch zwüsched Blache- und richtigem Volleyball gschpilt. Au das hett Pünkt gäh zu de Schlusswertig. Nach em Mix hemmer churz richtig Volley gschpilt und nachher hemmer no tschuutet. Anschiinend mit viiiiiiil z'chline Goals. Es hett guet ta sich mal wieder chli uusztoobe. Während oisne Games isch denn de Himmel immer bewölkter worde.
Das hett ois aber nid würkli gschtöört, will mer wieder aagfange hend choche. De Onkel Jörg isch ois denn au no cho es Bsüächli mache. Und nachdem er wieder gange gsi isch, hetts langsam aber sicher aagfange rägne. Zersch ischs noni so schlimm gsi, doch mit de Ziit isch mer froh gsi wenn mer nid bim Füür hett müässe luege, das es nöd verlöscht.
I oisem Huuszelt isch denn aber de Znacht ganz gmüetlich gsi. Chum simmer fertig gsi mit em Znacht, hett de Onkel Ernst aaglüütet und gfräget ob mer chönd i de Zelt schlaafe oder ob mer zu ihm in Cheller welled. D' Alopex hett denn aber gfunde, d' Zelt siged ja dicht und mir schlafid im Zelt. Denn ischs wieder a d' Ämtli gange. Mir sind nonig mal ganz uufgschtande gsi da rüeft d' Skua vom Zelt her: "Alopex, s' Zelt laht dure!". Und tatsächlich, de Warai und de Baikal ihres Schlaafzüüg isch scho rächt nass gsi…
Mir hend denn mit dem bizeli warme Wasser womer no gha hend abgwäsche, hend oises Züüg zämäpackt und is Auto verlade. D' Alopex hetts denn zum Onkel Ernst in Cheller abeta, während mir mit de Fitis uf Bäri abegloffe sind. I de Chile une hemmer denn erfahre, für was mer händ müässe eedli Chleider mitnäh. Mir hend e Modeshow gmacht ! Es isch mega luschtig gsi so d' Baikal i de Militärhose vo de Alopex zgseh und so! Denn hett ois denn d Alopex in Riedhof ufebracht mit em Auto. Dett hemmer ois denn parat gmacht für is Bett. Bevor mer den aber sind go schlaafe hetts no Guetzli gä und mir hend aagfange Spiili spile. Mir hend müässe Gegeschtänd darstelle. D' Baikal hett zum Biischpiil e Schoggicrème müässe sii und d' Skua es Zaabürschteli. Es isch sehr amüsant gsi de anderne zuezluege, wenns die Sache versuecht hend darzschtelle. Denn isch aber definitiv Ziit gsi für is Bett und innerhalb churzer Ziit hend alli tüüf und fescht gschlaafe.

Am Sunntigmorge hett ois d' Fitis gweckt und ois mitteilt, das d' Alopex scho wieder bi de Füürschtell am füürle isch. Denn hett si ois no en Bibelvers vorgläse, wos drum gange isch, dass Gott scho für ois luegt bervor mer ihn überhaupt drum bitted. Das hemmer ja schliesslich am Samschtigaabig därfe erläbe. Mir hend denn oises Züüg zämäpackt und sind füregloffe (ohni Gepäck). D' Alopex hett ois erwartet und ois mitteilt, si heb zwar no es Füürli zschtand bracht, allerdings hebed mer viiil zwenig trochnigs Holz… Au oise Chüälschrank, sprich: es Chischtli mit Milch und so im Bach, heb si zerscht müässe go zämäsueche… S' WC isch trotz de grosse Bemühige vom Blubb nüme würkli stabil gsi…
Drum hemmer beschlosse mer ruumid d' Blache und s' Material zämä. D' Baikal und ich sind de Alopex go helfe d Blache uufzhänke, während di ander zämägruumt hend. Wommer zrugg gsi sind, hemmer alles zum Auto treit. D' Alopex isch denn mit dem id Beckerei gfahre und Fitis hett mit em Roller uf ois uufpasst, will mir hend müässe laufe. I de Beckerei hemmer denn s Züüg trochegschtell und denn aagfangf choche. G'ässe hemmer denn i de Bachstube. Nach em Zmittag hemmer no müässe abwäsche und denn hetts no Rangverkündigung gä.
Denn isch, wäg em Rägä s'Lager verbii gsi. Mir sind denn no go s Gepäck hole. S' ganze Wuchenend hett mega Spass gmacht, trotz em Rägä!
Safran
  www.waldkauz.chback top