Bericht vom 22.08.09: RedBull verleiht Flüüüüüügel


Die vier Fraue (Fitis, Baikal, Silex, Laeta) sin dam 9.30 Uhr z Bäri vor dä EMK, wo au scho es Auto hiifahrt und drüü Manne usstieged. Die ghöred zum Seiltechnickteam und gänd eus hüt ihres wüsse wiiter. Doch als erschts ässed mir no es Gipfeli und erscht denn fanged mir aa. S Gländ muess zerscht besichtigt werde. Drum laufed mir dur dä Wald. Scho nach churzer Ziit frägt dä Samuel (dä gross mit dä Löckli), obs no öpis anders het, zum Abseile oder so. Sofort hät dFitis ä Idee. "Mir chönd doch vom Viadukt abe abseile. Das hät d Chrischona amis au gmacht." Also go luege chan mer ja emal. Die Herre sind sofort begeischteret. Mir möched eus wieder uf dä Wäg, zrugg zu dä EMK. Deet chömed mir nomal en "Krash-Kurs" in Sache Seil über. Und bald merked mir, dass euses Material nüme würklich defür geignet isch.
Im Nuu isch halbi 12i und langsam händ mir hunger. Drum ässed mir dä Hörndlisalat, trinked Ice Tea und schnabuliered zum Dessert no chli Guezzli. Denn bräched dManne uf, zum go dSache ufstelle. Eusi Hilf wends und brucheds dadebii nöd.
Es isch Ziit zum d Chind am Bäreplatz go abhole. D Silex isch scho di ganz Ziit am Red Bull trinke und hät sogar versuecht abeme Müürli abezgummpe. S Einzige wo sie hät devo, isch en verstuchte Fuess. Nüüt vo flüge. Drum isch sie au zimlich schlächt gluunt und hockt nur fuul ume. Sie verzellt denn dochno vo ihrem grosse Traum, chöne z flüüge. Mir drüü andere Leiterinne sind nöd sicher, ob mir d Silex würklich söled mitnäh. Will sie eus aber so i dä Ohre liit, beschlüssed mir, mit ihre noimeds hiizlaufe, wo sie sGfühl vom Flüüge chan usläbe. Natürlich nämed mir d Teilnehmerinne mit.
Endlich chömed mir bim Viadukt aa und dChind sind überwältigt. "Was, da sölled mir abe" - "Ui nei, mega krass" dönts vo dä eint und andere Siite. Doch d Ängst und Sörgeli wandled sich schnell i Vorfreud um und sie chönd fascht nüme warte, bis endlich losgaht. Doch zerscht werded nomal Chnöpf repetiert oder neu glernt. (Wär chan dä Fischer no? Oder dä Gsteckt-Achter?) Ändlich isch es so wiit und die erscht Person chan abseile: d Microtus! Sie macht das super, genau wie alli ander au. Die einte händ chli meh Angscht, die andere weniger. Wo all emal gsi sind, isch es zum Seilbähndli übergange. Au deet hät jede eimal abechöne. Natürlich hät das scho au chli Närve brucht für die Eint oder Ander.
Dänn häts gaaaaanz feine zVieri gäh (Danke Maya) zur Stärchig. Jetzt händ dLeiter no chöne und denn nomal d Teilnehmer. Doch au so en lässige Jungschinamittag nimmt emal es Änd und so händ mir wieder zrugg müesse. Zäme sind mir id EMK gloffe, wo d Fitis eus vom biblische Red Bull verzellt hät, wo eus chan Flügel wachse lah.
S Technickteam hät underdesse alles ganz elei abgrumt und isch denn au zu eus cho. Mir händ eus nomal chöne bedanke und denn sind sie gange. Au mir händ wieder müesse usenand gah. Doch d Erinnerige sind glaub blibe und suscht häts ja no Föteli

Blick auf - Hilf auf
Laeta
  www.waldkauz.chback top