Bericht vom 13.01.2007: Alu


Am 17.00 Uhr sind denn alli wieder hei gange. Ja so isch es gxi.
Tschuldigung, was? Du chunsch nöd drus? Ach so, du bisch nöd i dä Jungschi gxi! Ja denn isch alles klar! Also guet, ich verzelle dir vo Afang aa, wies gxi isch.

Dä Treffpunkt isch am halbi 2 bi dä Iishalle in Wetzikä abgmacht gxi. Uff, hät daaaas viel Lüt gha deet. Chömed die all id Jungschi? Nei, natürlich nöd. Sie händ ebe grad Iiskunstlauf gha und grad no Rangverkündigung. Aber wo stecked blos eusi Jungschärler händ mir eus gfräget? "Lueg det hine sinds doch", hät plötzlich d'Alopex gseit. Tatsächlich, jetzt han ichs au gseh. Mir händ alli päcklet und sind uf dä Parkplatz gange. Deet händ mir zerscht emal än Chreis gmacht, ich han ä langi Red ghalte (wär wo isch, wär abgmulde isch, blablabla). Denn händ mir chräftig es paar Lieder gsunge und ä schöni und interessanti Andacht vo dä Fitis ghört. Vergässed nöd was sie gseit hät über s'Brüele. Mir sind gärn für eu daa, wenn ihr eus mal bruched. Ja, denn isch es ab gange id Iiashalle. "Wär Schliifschue muess miete chunt zu mir", rüeft d'Fitis. "Und die wo händ chömed mit mir mit", dönts vo minere Site. 1,2, hopp sind d'Schue agleit und di Erschte stönd uf em Iis. Di einte wänd au no go luege wies i dä andere Halle äne Iiskunst laufed. Es bliibt nüt unversuecht. Au mir probiered Piruette z'dräie, ufzgumpe oder was weiss ich. Anderi möched Fangis. Nacheme chline Umfall vo dä Microtus und em feine Zvieri i dä Garderobe gönd di einte nomal ufs Iis. Mir mached nomal chli Spieli und denn schlüsst d'Halle. "Au mini Füess düend weh", ghört mer vo da und deet. Ja, es duet würklich guet us dene Schue usezcho. Dusse chömed all nomal chli Guezli über und s'neue Programm. Jetzt sind mir s'Erschtmal pünktlich fertig, eher chli z'früe. Drum werded nomal chli Spieli gmacht. Ebe, wie scho gseit, am 17.00 Uhr sind denn alli wieder hei gange. Jetzt weisch ja was mir gmacht händ!

Blick auf - Hilf auf
Laeta
  www.waldkauz.chback top